ESPERANTOLOGIA KONFERENCO

Sub la aŭspicioj de la Centro por esploro kaj dokumentado pri mondaj lingvoproblemoj (CED) kaj la Universala Esperanto-Asocio (UEA)

*** EK 2013 ***

La Centro por esploro kaj dokumentado pri la monda lingvoproblemo kaj la Universala Esperanto-Asocio aranĝos la 36-an konferencon pri esperantologio en Rejkjaviko, Islando.

Lingvoj: Esperanto kaj la dana (kun sinsekva interpretado en esperanton).

Tempo: 2013-07-25   09:00—13:00.

Loko: La salono Hirsch en la koncertejo kaj kongresejo Harpa, kie okazos la Universala Kongreso de Esperanto.

Partoprenontoj: Ĉiu aliĝinto al la Universala Kongreso rajtas partopreni.

Programo

• 09:00—09:30.   Eckhard BICK: La kunteksta vortaro DeepDict: Korpusa leksikografio en Esperanto
• 09:30—09:40.   Diskuto pri la prezento de Eckhard
• 09:40—10:05.   Probal DASGUPTA: `Postkuri' ne estas `kuri post': Esperanto kaj la plenvorta morfologio
• 10:05—10:15.   Diskuto pri la prezento de Probal
• 10:15—10:35.   USUI Hiroyuki: Prasennaciismo en oriento: japana ultranaciisto kaj ĉinaj anarkiistoj
• 10:35—10:45.   Diskuto pri la prezento de Hiroyuki
• 10:45—11:10.   Paŭzo
• 11:10—11:25.   Detlev BLANKE: Pri kelkaj lastatempaj esperantologiaj publikigaĵoj
• 11:25—11:35.   Diskuto pri la prezento de Detlev
  
• 11:35—12:00.   José Antonio VERGARA: Interskola ponto en Interlingvistiko: du reformoprojektoj de Esperanto motivitaj de Interlingua
  
• 12:00—12:10.   Diskuto pri la prezento de José Antonio
• 12:10—12:50.   Guðrún KVARAN: Islanda lingvopolitiko, la leĝo pri la islanda lingvo kaj la taskoj de la Islanda lingvokonsilio.
                          (Prelego en la dana kun sinsekva interpretado en esperanton.)
• 12:50—13:00.   Diskuto pri la prezento de Guðrún

CED kaj UEA planas eldoni volumon kun la prezentoj.

Resumoj ĉi-malsupre.

Organizantoj, komisiite de CED kaj UEA:
Christer Kiselman, gastprofesoro; membro de la Akademio de Esperanto; membro de la Reĝa Sveda Akademio de Sciencoj.
Adreso: Upsala Universitato, Poŝtkesto 337, SE-751 05 Uppsala, Svedio
Retpoŝtaj adresoj: kiselman@it.uu.se; christer@kiselman.eu     Kongresa numero: 183
kaj
Mélanie Maradan, tradukisto, terminologiisto kaj doktoriĝonto. Ŝi estas UEA-komisiito pri terminologiaj instancoj.
Adreso: Uni Mail, Faculté de traduction et d'interprétation, 40 Bd du Pont-d'Arve, CH-1211 Genève 4, Svislando
Retpoŝta adreso: melmaradan@yahoo.fr     Kongresa numero: 454

Resumoj (en alfabeta ordo)

• Eckhard BICK: La kunteksta vortaro DeepDict: Korpusa leksikografio en Esperanto
  Mi prezentos la kuntekstan vortaron DeepDict (ĉe www.gramtrans.com) kaj CorpusEye (Tekstaro-Rigardilo, ĉe corp.hum.sdu.dk), kiuj per reta interfaco montras kiel Esperanto vere uziĝas. Por ĉiu vorto, DeepDict kreas grafikan superrigardon pri la plej tipa uzo, fiksaj kombinoj kaj la vortkampo de la vorto. Ekzemple eblas facile vidi la diferencon inter scii kaj koni aŭ vidi la vortkampon de ĉevalo (rajdi, galopi, fojno, hufo, selo, k.t.p.). CorpusEye, aliflanke, montras indivuajn ekzemplojn de tutaj frazoj kaj kapablas studi la uzon de afiksoj aŭ la oftecon de novaj vortoj. Ambaŭ povas esti utilaj por leksikografoj, instruistoj kaj lingvemuloj, sed DeepDict ankaŭ celas lernantojn kaj ĝenerale homojn al kiuj mankas uzo-informoj en normalaj vortaroj.

  Biografieto. Dr. phil. Eckhard Bick estas germana komputillingvisto vivanta en Danio. Li studis en Bonno, Londono kaj Århus kaj akiris diplomojn pri medicino, lingvistiko kaj nordiaj lingvoj. Nuntempe li laboras por Suddana Universitato (Odense) kaj por sia propra firmao GrammarSoft, kreante porkomputilajn gramatikojn kaj leksikojn por la plej multaj ĝermanaj kaj romanidaj lingvoj, uzatajn i.a. en maŝintradukado (gramtrans.com), perreta instruado (beta.visl.sdu.dk) kaj korpusa lingvistiko (corp.hum.sdu.dk). Flankprofesie Eckhard ankaŭ instruas akupunkturon kaj laboras kun esperantaj projektoj, kiel Lingvohelpilo kaj WikiTrans. Li publikigis plurajn vortarojn, librojn pri ĉina medicino, esperantajn tradukojn (Muminvalo) kaj eĉ esperantan ludon (GEO-ludo), kaj li estas ĉefaŭtoro de la esperanta lernolibro Tesi la Testudo.

• Detlev BLANKE: Pri kelkaj lastatempaj esperantologiaj publikigaĵoj
  Mi informos i.a. pri lastaj eldonoj de fakaj informiloj, pri grava bibliografio, prezentos libron pri retorikaj stilfiguroj kaj pri terminologia agado. Mi krome resumos la enhavon de tri lastatempe eldonitaj aktoj de esperantologiaj konferencoj, pri la sesa kajero de la revuo Esperantologio / Esperanto Studies kaj pri la interlingvistika sekcio de Language Problems & Language Planning 2012.

• Probal DASGUPTA: `Postkuri' ne estas `kuri post': Esperanto kaj la plenvorta morfologio
  En la ĝenerala lingvistiko, jam de la sesdekaj jaroj ekzistas diverĝo inter tiuj, kiuj donas al la leksiko seriozan povon, kaj tiuj, kiuj traktas ĝin kvazaŭ nuran ŝaŭmon de sintaksa maro, kies ondoj decidas ĉion. Nomu ilin vortrealistoj kaj vortoskeptikuloj. La skeptikuloj donas multe da povo al la sintaksa komputado. Unu loko, kie ni povas trovi decidajn faktojn, estas la planlingvo Esperanto. Se la komputado-maksimumigaj vortoskeptikuloj plene pravus, la esprimmanieroj (a) Johano postkuris Petron kaj (b) Johano kuris post Petro havus la saman gamon da interpretoj. Sed eĉ en tiu ĉi kiel eble plej logika lingvo, se Petro iras ekzerce kuri kaj post unu-du horoj Johano iras ekzerce kuri, ni povas diri (b) sed ne (a). Temas ne nur pri unu kontrasto inter ĉi tiuj du esprimoj hazarde elektitaj, sed pri sistema fakto. Tiu ĉi sistema fakto pri la kunmetitaj vortoj kaj iliaj dismetaj egalvaloraĵoj aperas same klare en Esperanto, kiel en la etnaj lingvoj. Jen unu argumento por la vortrealisma starpunkto en la ĝenerallingvistika debato kontraŭ la vortoskeptikuloj. En la nuna studo, ni metas sub lupeon ĉi tiujn kaj parencajn fenomenojn en Esperanto, kaj uzas tiucele la aparaton de la vortofaraj strategioj.

• Guðrún KVARAN : Islanda lingvopolitiko, la leĝo pri la islanda lingvo kaj la taskoj de la Islanda lingvokonsilio
  En la jaro 2009 la Parlamento de Islando unuan fojon leĝdonis pri islanda lingva politiko. Tiu leĝo estis preparita fare de la Islanda lingvokonsilio dum periodo de du jaroj. Mi prezentos superrigardon de tiu evoluo kaj ties influo sur la lingva politiko ĝis nun. Grava rezulto estas ke nun ekzistas speciala leĝo pri la islanda lingvo, inklude de la islanda gestolingvo. Tiu ĉi leĝo kaj la lingva politiko estas gravaj apogoj por la laboro de la Islanda lingvokonsilio, kaj mi raportos pri la ĉefaj taskoj de la konsilio rilataj al la konservado de la islanda lingvo.

• USUI Hiroyuki: Prasennaciismo en oriento: japana ultranaciisto kaj ĉinaj anarkiistoj
  Ne estas vaste konate, ke la sennaciismo de Lanti havis sian precedencon en orienta Azio. En 1919, kiam Eŭgeno Adam ankoraŭ kredis pri nure helplingva rolo de Esperanto, japana ultranaciisto, KITA Ikki, fantaziis, ke en la plivastigota japana imperio oni adoptu Esperanton, kiu cent jarojn post la adoptiĝo forpuŝos ĉiujn etnajn lingvojn, inkluzive de la japana, fariĝante la sola lingvo en ĝia teritorio. Eĉ malpli konatas la fakto, ke tiurilate la ultranaciisto inspiriĝis el siaj rilatoj kun ĉinaj anarkiistoj, kiuj pledis por la anstataŭigo de la ĉina lingvo per Esperanto en la komenco de la 20-a jarcento. Tiu ĉi referaĵo provas prilumi la socikulturan klimaton en orienta Azio, kiu ebligis tiom fruan ekburĝonon de sennaciecaj ideoj. Tion helpis i.a. grava manko de etnolingva memfido pro la geopolitika situo de tiu ĉi mondparto kiel marĝenigita periferio en la moderna mondo.

• José Antonio VERGARA: Interskola ponto en Interlingvistiko: du reformoprojektoj de Esperanto motivitaj de Interlingua
  Lanĉita en 1951 de Alexander Gode nome de IALA, Interlingua estas la sola nuntempa internacia planlingvo krom Esperanto kun iom da organizita agado ĉirkaŭ si. Kiel ekstrema reprezentanto de la naturalisma skolo en Interlingvistiko, ĝia ĉefa konstruprincipo estas la alpreno de la t.n. internacia vortaro (fakte latindevena) kun latinida gramatiko, iom simpligita laŭ la modelo de la angla. Pro tiu limigita internacieco, la tekstoj en Interlingua estas unuavide kompreneblaj al uzantoj de la diversaj latinidaj etnolingvoj.

  Ekde la apero de Interlingua estiĝis intensa debatado inter ĝiaj subtenantoj kaj tiuj de Esperanto pri la demando kiuj estas la plej taŭgaj kriterioj por konstruita interlingvo. La koncernajn argumentojn oni esprimis jen per polemikaj pamfletoj, jen per sobraj studoj.

  Interese, la rimarkindaj trajtoj de Interlingua kaj la ioma atento kiun ĝi atingis ĉe iuj sciencaj kaj klerulaj medioj motivis du serioze elpensitajn proponojn reformi Esperanton, kiuj tamen ne atingis subtenon. Iliaj respektivaj principoj orientiĝis respektive al tio kian formon la latin- kaj grekdevenaj etimoj havu (Albert Lienhardt, Optimala ortografio de la Internacia Lingvo Esperanto, 1978), kaj al propono por plena esperantido konstruita laŭ Interlingua-kriterioj de vortara internacieco sed kun Esperantotipa skemeco (W. Verloren van Themaat, Demolingwo, 1985–1996).

  Komparante la ĉefajn elementojn de la interlingvistikaj skoloj naturalisma kaj skema, tiel kiel ili rimarkeblas ĉe respektive Interlingua kaj Esperanto, la referaĵo detale ekzamenos la menciitajn projektoproponojn, utiligante i.a. la neniam publikigitan manuskripton pri Demolingwo kiun la verkinto sendis al la preleganto antaŭ sia forpaso.

  Biografieto. José Antonio Vergara (n. 1962). Fakulo pri publika sano, li instruas historion de medicino kaj scienco, antropologion de sano kaj epidemiologion en la Universidad San Sebastian (Puerto Montt, Ĉilio). Li interesiĝas pri Evolua Biologio, Lingva Ekologio kaj Esperantologio. Nuna prezidanto de Internacia Scienca Asocio Esperanta (ISAE), li prelegis kvarfoje en IKU pri diversaj temoj, kaj ankaŭ en la centjariĝa ISAE-festkonferenco (2006), en Simpozio pri nur-angla scienco en multlingva mondo, organizita de Esperantic Studies Foundation kadre de la AAAS-jarkonferenco (Boston 2008), kaj en la ILEI-simpozio en la Universitato de Kopenhago (2012).

—

Al la komenca paĝo de la retejo de Christer.